МОЛИТВЫ СВЯТОМУ ИСИДОРУ, ХРИСТА РАДИ ЮРОДИВОМУ, ЧТОМЫЕ В РОСТОВСКОЙ ВОЗНЕСЕНСКОЙ ЦЕРКВИ, ЯРОСЛАВСКОЙ ЕПАРХИИ.
Молитва 1.
О, преблаженный и великий угодниче Христов, святый праведный Исидоре! Восхваляя равноангельское житие твое и преславные от честных мощей твоих истекающие чудеса прославляя, ко святому гробу твоему припадаю смиренно и во умилении зову:
Радуйся, пресветлая звездо, от запада притекшая и на восток просиявшая;
Радуйся, отринувый неправоверие, уставы же православия до конца соблюдый;
Радуйся, бывый яко буй пред очима мира греховнаго, Божией же премудрости некрадомое сокровище стяжавый;
Радуйся, суетное и тленное поправый, да восприимеши венец нетленен;
Радуйся, терпением древнему Иову уподобивыйся;
Радуйся, воине Христов непобедимый, доблестно диавола победивый и все стрелы лукавого разженныя угасивый;
Радуйся, многие и дивные цельбы от святого гроба твоего источающий;
Радуйся, смиренномудрием богатеющий и чистоты сосуд избранный явивыйся;
Радуйся, с верою призывающим тя скорый помощниче и заступниче;
Радуйся, яко течение добре скончал еси и веру непорочно соблюл еси, и врагов бесплотных терпением твоим попрал еси, и мирские суетства препобедил еси.
Сего ради и святая твоя чистая душа на небеса востече радующися, праведных же лицы сретоша тя веселящеся и небесные селения светло восприяша; блаженное же и честное тело твое на земли пребывает нетленно, верным исцеление подавая.
Тем же молим тя, богомудре Исидоре, да ходатайствуеши о нас у Христа Бога, еже пребыти граду сему непоколебиму и безмятежну, правоверному же императору нашему Николаю Александровичу на супостаты победу и одоление даровати и всем православным христианам здравие и благое поспешение подати, да сподобимся вси милости и благодати Господа нашего Иисуса Христа, ему же подобает слава и держава, купно со безначальным отцем и с пресвятым и благим и животворящим его духом ныне и присно
и во веки веков.
АМИНЬ
Молитва 2.
О, великий угодниче Божий, святый праведный Исидоре!
Помози мне, грешному, всегда страстию греховною побеждаемому, ты бо еси предстатель и заступник и скорый помощник в скорбех моих и усердный ходатай спасения моего.
Ты верою правой и трудом твоим вечной славы и царствия небеснаго сподобился еси и ныне у престола владыки всех,
царя Христа, Бога нашего, предстоиши.
Тем же и молю тя, страстотерпче праведный: помяни мя, окаянного, в тине греховной валяющегося, уже бо не могу возвести очи мои к горнему Сиону, зане связан есмь сетьми диавольскими и попечениями житейскими. Избави мя молитвами твоими от всяких злых наветов вражиих и от всякаго зла, да прииму исцеление от язв греховных, от вселютейшаго змея наложенных мне. Все житие мое окаянный аз во сластех мира сего изнурих и не имам помощника,
и не вем, к кому прибегнути, да подаст ми руку помощи.
Сего ради к тебе прибегаю и сице молюся:
О, святый праведный Исидоре! Подаждь ми помощь в день страшнаго суда, егда приидет сын человеческий судити всех, тогда умоли того страшного и нелицемерного судию, да не осудит мя по беззакониям моим, но да поставит одесную себе по велицей милости своей. Помолися, владыце,Христу Богу, да и в нынешнем веке милостив будет нам, грешным и недостойным рабам своим, и да утвердит мысль нашу, еже отвратитися нам от всякаго зла и соблюдати спасительные его заповеди, и прочее время жития нашего прейти в покаянии и соблюдении Божиих заповедей, да, достигше небесных обителей, непрестанно славим единаго триипостасного Бога, отца и сына и святаго духа, ныне и присно и во веки веков. АМИНЬ
